Si pàsiat a manera durci in campura sutapostu a orienti dae s'arroca vurcànica de su monti Arci e acostau a ocidenti dae su stàniu de Pauli Majori, a pagu tretu dae is spiàgias meravilliosas de su Sinis. Prammas est una bidda de agimmai 500 abitantis de su Campidanu de Aristanis cun un'economia fata prusatotu de allevamentu, produtzioni de canciofa, mandarinu, aràngiu e axina. Sa bidda esistiat giai in s'edadi de mesu e prus a mancu in su milli nasciant tres biddixeddas; Palmas Majori e Palmas de Ponti scumparriant giai in su XV sec., Villa de Palmas intamis est sa bidda chi agataus a di de oi. A s'inghitzu su nòmini fiat feti Palmas – po mori de is matas de pramma chi dda ingiriànt -, in su XIX sec. dd'iant aciuntu fintzas Arborea po non dda ammesturai cun un'àtera Prammas (de San Giovanni Suergiu).
In su mesi de obrili po Sant'Antiogu si faint is parìllias palmaresas, unu atòbiu de cuaddus e grupus folk po sa cursa de is tre aneddus; is cuaderis depint infrissiri tres aneddus e a pustis faint genias de balentesa.
In su mesi de onnisanti sèmpiri po afestai su santu si fait una rassìnnia bella meda de cardolinus.
In su sartu ingìriu a sa bidda si podint atobiai pillonis ispantosus e una flora chi si scerat po sa
presèntzia de sa sennorica.
De importu mannu est fintzas su monti Arci, po sa presèntzia de sa perda crobina. Sa punta prus arta de su monti est Trebina Longa, chi s'istrantaxiat fintzas a 812 metrus). In su territòriu de Prammas agataus sa foresta de sa Dispensa, 150 ètaras in ui podeus atobiai buchimelis, schirrus e pillonis avutzus.
